Записки древлеправославного неформала... (neclud) wrote,
Записки древлеправославного неформала...
neclud

Category:

Житие преподобнаго отца нашего исповедника Серапиона Черемшанскаго

В Балаково (Саратовская область РФ) наконец-то началось строительство храма во имя преподобнаго отца нашего исповедника Серапиона Черемшанскаго. Да поможет Господь о.Михаилу Родину ( mrodine ) и его помощникам! В связи с этим делаю перепост Жития исп.Серапиона из ЖЖ о.Михаила.

Оригинал взят у mrodine в Житие преподобнаго отца нашего исповедника Серапиона Черемшанскаго
Месяца апрелия во осьмыинадесять день память преподобнаго и богоноснаго отца нашего Серапиона, Черемшанскаго чюдотворца, благослови отче.

Сей преподобныи отец наш Серапион родися от родителю благочестиву в лето семь тысящ триста тридесять первое, и нарекоша имя ему Симеон. Отец же его, Иоанн зовомыи, пореклом Абачин, бяше отрода купеческа. Переселижеся от отечествия своего, Нижеградских пределов, села Мурашкина во град Саратов. Симеон же отрок возрасташе во страсе Божии и любви к божественным писанием. Прилежаше же опасно древлеблагочестивому церковному преданию, новин же беззаконных удаляшеся вконец и отрицаше. И толику являше любовь к божественному писанию, яко день и нощь упражнятися в чтении божественных словес. Гонения же еретическаго ради, яже возбраняху учитися чтению древлеправославным християном, почитоваше сей книги отай, в подземелии дому родительскаго. И исполнився божественныя любве, аще и юн бяше возрастом телесным, мудростию же духовною многих старец превзошед, остави дом и сродники своя, и возжеле жития мнишескаго. И понеже бывшия преже близ Саратова Иргизския монастыри гонители разориша, пойде в стародубския пределы, во древлеблагочестиваго предания монастырь. Гонению же еретическому в Русии умножевшюся, со некиими благочестивыми християны прейде во иностранныя пределы, и вселися в турецкую землю, в Добруджю, во Славскии монастырь, и бысть мних. И наречеся имя ему Серапион. И тамо пребывая бяше и вовремя, егда паги святая Божия Церкви восприят первую свою добрОту, сиречь священныи архиерейскии чин обнови. Ибо в лето семь тысящ триста пятьдесят третие митрополит греческии Амбросии, познав правду древлеправославныя веры, совокупися ко святей Церкви и возобнови святительскии чин. И по летех пятинадесяти паки прииде во страну Русийскую, и вселися уграда Хвалынска, в месте нарицаеме Черемшан. И бысть начальник малому монастырю. И поставлен бысть во священныи иерейскии сан от преосвященнаго епископа саратовскаго Афанасия, иже таможе крыяшеся гонения ради еретическаго, и бысть священноинок и игумен. И вдаде ему епископ малую платняную церковь со освященным путевым престолом, еже есть святыи одикон. И служаше во оной божественную службу крыяся, занеже во оны дни не леть бяше древлеправославным християном имети явно ни церкве, ни звона, ни ходов крестных, ни литоргии, прещения ради еретическаго. Монастырь же святаго пребываше сокровенне в вертограде девицы Феклы, пореклом Толтиковы, иже тайне прият мнишескии образ со именем Фелицата.
Иногда же всенощное творящу бдение святому со братиею, праздника ради воскресения Христова, внезапу аки татие и разбойницы, влезоша воини во окно храмины, идеже беяше путная церковь, и яша всех обретшихся тамо и всадиша в темницу во граде Хвалынсце. Оле дерзости, нуждаху бо несвященнии священных страдальцев отврещися священнаго иноческаго образа и древлеправославнаго священства. Ввергоша же во юзилище и саму тую матерь Фелицату, и долее лета единаго пребыша безвиннии в неправедном заточении. Бог же премилостивыи яви великое свое милосердие на иноцех сих, яко вложи в сердце начальника темницы любовь нелицемерну ко святым страдальцем. И попусти верным християном, да принесут во юзилище святыя книги и иконы, и священныя ризы, и вся, яже есть потребно для церковныя службы. Оле чюдо: как бысть темница и монастырь, и церковь Божия. И пребольшее знамение яви Господь паки: яко в нощь пресветлаго праздника Пасхи Христовой мнозии християне приидоша и внидоша в темницу, начальнику тако попустившу, составиша собор велии праздника Христова ради, и светло пресветлому воскресению во темницы праздниство духовное сотвориша.
Последи же судии невернии, приговориша верных ко взысканию пенязей и телесней позорней казни. Обаче Бог суди иначе, яко в той самыи час, егда приведоша преподобных страдалец на позорище и уготовиша сосуды мучительныя, приспе внезапу вестник царскии, привез указ царев о возбранении всех телесных казний, и абие отпущени бышамниси.
Паки же возвратися преподобныи на Черемшан и паки обитель составляет. И умножися число братии, и прейде на ново место выше по горе, еже Верхнии Черемшан нарицается. И тамо составися мужескии монастырь. Женскии же пребыть на Нижнем Черемшане, идеже пребываше мати Фелицата.
По мнозех же летех вселися на Черемшане Иосиф Гончаров, бывыи преже последнии атаман казаков некрасовских, иже живяху вДобруджи. Сей бяше от мног лет знаем преподобному Серапиону и любовь нелицемерну име ко святому. Бяше же знаем и самому царю тому Александру второму, иже и прежде многажды увещаваше Гончарова преселитеся от турецкия державы в Русию. Сей же Гончаров внят последи цареву совету и вселися на Черемшане и прииде к царю и прият бысть с великою честию. И испроси от царя устроити на Черемшане каменную церковь. И построиша соборную церковь во имя пресвятыя владычицы нашея Богородицы и Приснодевы Марии честнаго и славнаго ея Успения и Покрова. Гончаров же, стар сыи, изволи приити во мнишескии чин, и пострижен бысть от святаго со именем Иоасаф и в мале времени преставися преже освящения церкви. В лето же семь тысящ триста девяностое месяца октября освятися соборная церковь от древлеправославных архиереов, Амбросия епископа Саратовскаго и Пафнутия епископа Казанскаго и триех святых исповедник, иже на премногая лета претерпеша заточение за веру в темници суждальскаго монастыря: преосвященнейшаго архиепископа Аркадия Славскаго, иже первее живяше во Славстем монастыри, идеже и преподобныи Серапион в та же лета пострижен бысть; и блаженнаго Конона епископа Новозыбковскаго; и славнаго страдальца Генадия епископа Пермьскаго. Аркадии же святитель претерпе неправедное заточение втемницы лет двадесять и осмь, Конон же епископ двадесять и шесть лет, преосвященныи же Генадии шестьнадесят лет. И чюдо бяше зрети, яко живии новии мученицы освящаху Божия олтари и мощи древлих мученик во святилищих полагаху.
Серапион зе святыи толику кротость являше, яко и прошаше епископа Амбросия, да отставит его от игуменския власти. Обаче архиерей не внят молению и не попусти светильнику быти подспудом, но на свещнице того водрузи, яко не точию игуменства не отстави, но и архимандритом сотворяет того.
Бяше же святыи Серапион телом сух и взором приветен, излиха нищелюбив и милостыни податель неоскуден. И бяше видети на киждо день множество проситель и нищых, ожидающих егда изыдет преподобныи ис церкве. И никтоже их николиже отиде от преподобнаго празден, и не получив прошения своего. Келарь же монастырскии пеняше святому, аки бы разоряет обитель безмерныя ради милостыни. Преподобныи же поучаше того от святых писании ненадеятися на богатство гиблющее, но точию на Бога все упование имети и миловати нуждающыяся.
И велии подвиг творяше преподобныи, яко не точию железныя вериги ношаше непрестанно, но и на многая лета кииждо день сам служаше святую литоргию и причащашася божественных Христовых Таин. Посещаше же присно и больныя братию и утешаше я. И на кииждо день почиташе братии божественная писания и толкования святых отец. И сам присно учаше вся люди благочестию и правой вере, и любви и страху Божию.
И тако пожив вцеломудрии и добродетелех многих, поболе ногами мало днии, и причастився божественных Христовых Таин, и благослови братию, преставися коГосподу, Егоже присно желаше и Емуже во всем житии своем не престанно бе работая, в лето семь тысящ четыреста шестое, месяца генваря в седьмыи день, на праздник Собора святаго Иоанна Крестителя. И велие множество верных собрася на погребение святаго, и слезы проливаху над священным того телом. И погребоша того честне. И чрез десять лет обретоша святыя мощи преподобнаго отца Серапиона нетленны и целы весьма. И множество народов сверою приступающе ко его гробу, покланяхуся и лобызаху святыя мощи, исцеления благодать отнедуг приемлюще, и одержимии отдухов нечистых исцеляхуся в монастыри том многажды по молитвам святаго.
Молитвами Господи угодника Твоего Серапиона ниспосли на ны милости Твоя и подаждь нам оставление
грехов, и сподоби присно угождати Тебе, и воспевати Тя Святую Троицу, Отца и Сына и Святаго Духа, ныне и присно и вовеки векОм, аминь.



https://vk.com/balakovoserapion

Перепечатано из сборника "Вифлеем — Дом Хлеба" №4, стр. 119.
http://www.blackmonk.ru/vifleem/vifleem04/

Tags: святые, старообрядчество
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments